Gloria Cáceres Vargas

Gloria Cáceres Vargas

Gloria Cáceres Vargas, Colta llaqtapi, Ayacucho suyupi paqarirqa. Qanchis watayuqllawan kaspa ayllunkunawan Chosicaman ripurqanku. Chaymi warma kayninqa, sipas kayninpas uriwasqa karqa kay samay pachakunapi sapa wata llaqtanman kutiptinku. Sapa puririyqa siminkunawan, yachayninwanpas huk tupaymi karqa. Harawikuna, willaykuna qillqasqanqa, kay llapa imay kawsasqanpa rurunmi. Kunankama qillqasqa librunkunata riqsichirqaña: Riqsinakusun (1996 watapi), Munakuwaptiykiqa (2009), Wiñay suyasqayki (2010), Yuyaypa K’anchaqnin (2015). Chaynallataq Warma kuyayta huk willaykunatapas (2011) José María Arguedaspa qillqasqanta runasimiman tikrarqa. Paypa qillqasqa willaykuna, harawikunapas kanmi ichaqa manaraqmi riqsichinchu. Wakin peruano qillqaqkunapa utaq tiqsimuyu qillqaqkunapa qillqasqanta tikrarqa ñataq runasimiman ñataq españapa simimanpas, imayna munasqanman.

Universidad Nacional de Educación Enrique Guzmán y Valle – Lima nisqanpi, qullana yachachiq karqa, chaypim tukuy laya ruwanakunata allinta qispichirqa. Chaynallataq Franciapi, Instituto Nacional de Lenguas y Civilizaciones Orientales nisqanpi, INALCOpi runasimita yachachirqa (1999 watamanta 2005 watakama). Hinallataq Parispi wakin universidadkunapi, Nouvelle Sorbonne nisqanpi, Cergy Pontoise nisqanpipas (2001manta–2005kama) huk yachaykunata yachachirqa. Qipamanñataq Ministerio de Educación – Dirección de Educación Intercultural Bilingüe (iskay simipi) nisqanpi llamkarqa; Chaymanta Universidad Union – Ñaña nisqanpi llamkarqa (2012manta–2015kama). Hinallataq achka Hununakuyman Literatura runasimipi ruraymanta tukuy lawpi kaqta rirqa. Kunan kunataq ruwayninqa runasimiman tikrayqa utaq español siminman tikraypas kachkan hinallataq frances simimanpas.