Julieta Zurita Cavero
Sutiy Julieta Zurita, Bolivia suyumanta Quchapampa llaqtamanta kani, qhichwa rimaq kani, San Simon Jatun yachaywasipi qhichwa simita yachachini.
Unayña Iskay simipi kawsaypurapi yachachiyta EIB ñisqata tanqani. Chantapis imaynatataq qhichwata mama simitajina, manaqa iskay kaq simitajina yachachiqkunaman kamachini. Jinallatataq imaymana p’anqakunata, materialesta qhichwata yachachinapaq wakichini, kay qhipa watakunapitaq imaymana qillqata qhichwamantaq, manaqa qhichwaman tikrani. Chantapis sinchi munaywan arawikunata, jawariykunata ima, qhichwa simita misk’irichinapaq, munarichinapaq qillqani. Juk jatun p’anqata Atuq Antuñumanta antología ñisqata kimsa simipi: qhichwapi, kastillapi, ingles simipi ima qillqallanitaq, kaytaqa jawariykunataqa andino runap kawsayninta, yuyayninta, yachayninta ima karu llaqtakunapi riqsichinapaq qillqani.
Jinamanta kay tukuy qhichwa kawsayninchiqwan kallpachasqa imaymana jawa llaqtakunata mink’asqa yachachiqjina muyumuni. Panamá suyuman, Peruman, Argentinaman, Colombiaman, Venezuelaman, Brasilman, Mexicoman, Estados Unidosman, Franciaman, Inglaterraman, Alemaniaman, Belgicaman, imaymana yachaykamayuq qutuchakuyman chayani.
Ajinataq kunankama jatun munayniyqa qhichwa simita, qhichwa kawsayta, wakin yuriqi simitawan kallpachaytaq, riqsichiytaq kachkan.
.
